ကျွန်တော့်အနေနဲ့
ဘိလိယက်ကလပ်တစ်ခုကို ပိုင်ဆိုင်နေရတဲ့ဘ၀က
လွတ်မြောက်ချင်ခဲ့ပါပြီ။
ကျွန်တော်တို့ဟာ
ဘိလိယက် စားပွဲမှာ နေ့စဉ် မျက်နှာချင်းဆိုင်ရ
စိတ်ရှိသလောက် ဆန့်ထုတ်ထားတဲ့
တုတ်တံရှည်များကိုင်ပြီး မုဆိုးဆန်ဆန် ချောင်းမြောင်းရ
ကိုယ်လိုချင်တဲ့ သားကောင်ကို မာယာပရိယာယ်ဆင်
ထောင်ချောက်ထဲသွင်းကြရ
အစိမ်းရောင် သက္ကလပ်တောမှာ အရောင်မျိုးစုံ လိမ့်နေတဲ့
မက်မောမှုများ
ကိုယ်နိုင်လိုက်တဲ့ပွဲက ကျေနပ်ဖွယ် အပြည့်အ၀ရရဲ့လား
ကိုယ်ရှုံးလိုက်တဲ့ပွဲက ဂုဏ်သိက္ခာရှိရှိနဲ့ ဟုတ်ရဲ့လား။
ကျွန်တော်တို့ဟာ
လူကြီးလူကောင်း ဟန်ချက်နဲ့
လူသတ်သမားလို ဆတ်ခနဲ ထိုးချိန်ပစ်ချလိုက်ကြ
တစ်ယောက်ကို တစ်ယောက် ကွက်တိ . . .
ကျွန်တော်တို့ဟာ
ပိုက်ဆံနဲ့ ဘ၀အပေါ် ရမ္မက်ထ
ဘိလိယက် တစ်ပွဲလောက် ကစားလိုက်ရမှ
နေသာထိုင်သာရှိ။
ခမ်းနားတဲ့ အဖြေတစ်ခုမရခင်
ကျွန်တော်တို့ ရုတ်သိမ်းသင့်ရဲ့လား
ဟောဒီ ဘိလိယက်ကလပ်ကို ။ ။
No comments:
Post a Comment