ဒီလိုပဲ
ခင်ဗျားတို့ တွေးခေါ်ခဲ့သလိုပဲ
ခင်ဗျားတို့ ထူးဆန်းခဲ့သလိုပဲ
ခင်ဗျားတို့ ရိုးအီခဲ့သလိုပဲ
အီရတ်ဆီ အပျော်ခရီးထွက်ဖို့ ခင်ဗျားတို့ မစဉ်းစားခဲ့သလိုပဲ
ပိုက်ဆံမရှိတဲ့ရက်မှာ အနုပဋိလောမကို
အတည်ပေါက်ရွတ်ခဲ့သလိုပဲ
ခင်ဗျားငိုခဲ့သလို ကျွန်တော် ရယ်ခဲ့ဖူးသလိုပဲ
အသည်းအသန်လုစီးရတဲ့ ဘတ်စ်ပေါ်
(၇၀) ကျော် အဘွားကြီးလည်း
မညဉ်းတော့သလိုပဲ
မိန်းမတစ်ယောက်ရှိဖို့လိုအပ်ကြောင်း
သွေးသားကတောင်းဆိုခဲ့သလိုပဲ
နတ်ပွဲလည်းကြိုက် ချဉ်ငံစပ်လည်းကြိုက်
မရှက်တရှက်လေး ဖော်ရမှာကြိုက်တဲ့
ခေတ်ပေါ် မိန်းမများရဲ့ လူရာဝင်သလောက်ပါပဲ
ခြေတစ်ဘက်ပြတ်သွားတဲ့
ကလေးတစ်ယောက်ရဲ့ အနာဂတ်ကို
ကမ္ဘာကြီးက စဉ်းစားမပေးသလိုပဲ
ခင်ဗျားနေခဲ့သလို ကျွန်တော် မသေချင်သေးသလိုပဲ
ဘယ်လိုနေနေ
အပြစ်မလွတ်တဲ့
ခင်ဗျားတို့ ကျွန်တော်တို့ရဲ့ ချုံးပွဲချဟာသတွေလိုပဲ
ကိုယ့်ဘ၀ကိုယ် ရွံမှာကြောက်ပြီး
ကိုယ့်အကြောင်း မရောက်အောင် တွေးခဲ့သလိုပဲ
ခင်ဗျားလည်း ထမင်းဆာနေသလို
ကျွန်တော်လည်း ကားခိုးစီးခဲ့သလိုပဲ
ဒီလိုပဲ
ခင်ဗျား ပြောခဲ့သလိုပဲ
ခင်ဗျားလျှောက်ခဲ့သလိုပဲ
ခင်ဗျား ကောက်ကျစ်ခဲ့သလိုပဲ
ခင်ဗျား ပန်းပွင့်ခဲ့သလိုပဲ
ခင်ဗျား နေ၀င်ခဲ့သလိုပဲ
ခင်ဗျား မိုးမလင်းခဲ့သလိုပဲ
ဘ၀ကို ပျော်သလိုကြာခိုခဲ့တဲ့
အနှစ် (၃၀)
ဒီလိုပဲ
ခင်ဗျား ထင်တဲ့အတိုင်းပဲ
ဟိုရောက် ဒီရောက်နဲ့
ဘယ်မှ မရောက်ခဲ့တာလည်း
တူတာပဲ ။ ။
No comments:
Post a Comment